Upphaflega var ákveðið að frumsýna The Boondock Saints II: All Saints Day hér á Íslandi. Það var ekki búið að finna dagsetningu og það ylti í rauninni á því hvernig ræmunni myndi ganga í bíó vestanhafs. Sena reyndi með bestu getu að fá myndina sýnda í Smárabíói og það virtist ætla að takast í smátíma, en núna hefur Sony því miður ákveðið að útiloka það.
Ástæðan er mjög óljós, en það koma ýmsar til greina; Myndinni hefur gengið skítsæmilega í miðasölum úti en ekki nógu vel til að réttlæta það að setja hana í bíó út um allan heim. Auk þess eru aðstandendur ekki ánægðir með þá slæmu dóma sem hún hefur fengið (þótt aðdáendur segjast vera mjög sáttir, að megnu til).
Það lítur út fyrir að myndin fari beint á DVD og það gildir um flest öll Evrópulönd, ekki bara okkur. Ekki er búið að ákveða dagsetningu en ef ég ætti persónulega að giska þá myndi ég skjóta á páskanna á næsta ári eða eitthvað í kringum það tímabil.