Avatar náði merkilegu meti um helgina. Hún var fyrsta myndin til að vera 6 vikur í röð á toppnum í Bandaríkjunum síðan Titanic gerði slíkt hið sama á sínum tíma. Nú um nýliðna helgi dustaði hún samkeppnina af sér eins og dauðar flugur og sýndi engin veikleikamerki með 36 milljónir dollara í tekjur. Er hún orðin næsttekjuhæsta mynd sögunnar í Bandaríkjunum með 552 milljónir til þessa. Það er aðeins tímaspursmál hvenær hún tekur fram úr Titanic og 600 milljónunum hennar í Bandaríkjunum.
Hins vegar er það ekki tímaspursmál hvenær hún verður opinberlega orðin tekjuhæsta mynd allra tíma á heimsvísu, því það mun gerast í kvöld. Eftir sunnudaginn stendur Avatar uppi með 1.836 milljónir á heimsvísu á móti 1.842 milljónum Titanic, og dagsaðsóknin á Avatar er enn svo mikil að á morgun verður metið fallið.
Velgengni Avatar er reyndar orðin svo svakaleg að aðrar myndir eru ekki að fá þá athygli sem þær eiga skilið að fá. Yfirnáttúrulega spennumyndin Legion, með Paul Bettany í aðalhlutverki varð önnur í Bandaríkjunum með 18 milljónir dollara, ekki slæmt það, á meðan The Book of Eli varð þriðja með 17,2 milljónir. Gamanhasarinn Tooth Fairy, með Dwayne Johnson (The Rock) í titilhlutverkinu, náði fjórða sætinu á sinni frumsýningarhelgi með 14,5 milljónir.
Spennumyndin Extraordinary Measures með Harrison Ford og Brendan Fraser olli vonbrigðum og náði aðeins 7 milljónum í kassann. Aðalástæðan fyrir þeirri niðurstöðu er talin vera sú að það er ekki árið 1996 lengur.
Um nýliðna helgi gerðust önnur tímamót sem hefðu mögulega þótt fréttnæm ef ekki væri fyrir James Cameron. Alvin and the Chipmunks: The Squeakquel fór yfir 200 milljón dollara markið, sem í dag hljómar eins og skiptimynt. Á sama tíma í næstu viku mun Sherlock Holmes gera slíkt hið sama.
Næstu helgi verður Mel Gibson sigað á Jake Sully og félaga, og því spyrjum við: haldið þið að Edge of Darkness eigi séns í að slá Avatar af toppnum?