One Fine Day (1996)

Hver kannast ekki við það að vera heima einn eða með einhverjum nákomnum og vilja horfa á mynd sem hægt er að spjalla yfir og sem kemur manni í gott skap? One fine day er þannig. Hún fjallar um mann og konu, Jack og Melanie, sem eiga það eitt sameiginlegt að vera skilin við maka sína og að eiga börn sem eru í sama bekk og eiga að fara í skólaferðalag saman. Jack vinnur hjá stóru dagblaði og er mjög upptekin við vinnunna og hittir dóttur sína ekki oft, en þegar barnsmóðirin giftir sig aftur og þarf að fara í brúðkaupsferð þarf Jack að passa dóttur sína í viku. Melanie er arkitekt og er vön að vera mjög sjálfstæð og hefur alið son sinn upp að mestu leyti sjálf. Þau hittast í skólanum og komast að því að þau eru orðin of sein í rútuna og hlaupa niður að höfn til að koma börnum sínum um borð í bátinn. Þar sjá þau að báturinn er að fara án þeirra og eru þau í vandræðum með börnin. Jack þarf að fara á blaðamannafund og Melanie á kynningu fyrir hugsanlega kaupendur, Jack stingur upp á að þau passi börnin fyrir hvert annað en Melanie tekur það ekki í mál. Á meðan eru börnin að leika sér með símana þeirra og skiptast óvart á þeim. Jack og Melanie komast að þessu og þurfa að hittast aftur til að skiptast á símum og ákveða þá að passa börnin fyrir hvert annað. Þau lenda í alls kyns ævintýrum í New York borg
Myndin er hugljúf og rómantísk og mjög fyrirsjáanleg en samt skemmtileg til að horfa á ef maður er í ákveðnu stuði.