Deliverance (1972)

Þessi frábæra mynd er einfaldlega skylduáhorf fyrir alla unnendur góðra kvikmynda. Myndataka, leikur og handrit skapa spennuþrungið andrúmsloft sem seint verður leikið eftir. Burt Reynolds og Jon Voight í sínum langbestu hlutverkum. Banjóatriðið er eitt af þeim minnisstæðari í kvikmyndasögunni.

Mjög góð mynd, svolítið drungaleg. Sveitaliðið alveg sérstaklega óhugnalegt. Hérna er Burt gamli Reynolds ungur og flottur og hefur á þessum árum haft einhvern metnað. Hann sýnir fínan leik hér en eftir þessa mynd hallaði undan fæti og hann hefur leikið í ótal ruslmyndum síðan. Hefur að vísu verið að sækja á núna á gamals aldri. Jon Voight á stórleik í þessari mynd en á seinni árum er hann ekki eins vandlátur á hlutverk. Eini mínusinn við þessa mynd er að hún hefur elst frekar illa. En ég mæli með henni við alla kvikmyndaunnendur...

Áhugaverð mynd frá 1972 sem segir frá helgarferð fjögurra félaga upp í sveit þar sem þeir hyggjast sigla á kanóum niður stóra á, en þetta er eitt síðasta tækifæri þeirra til þess þar sem verið er að byggja stíflu sem mun eyðileggja ána og fallega landslagið sem umlykur hana. Þegar komið er í sveitina rekast félagarnir á sveitabúana sem eru minna en vingjarnlegir, nautheimskir og hálf vanskapaðir sökum innræktunar. Félagarnir fjórir gera óspart grín af þeim en halda síðan af stað í kanóferðina. Það er síðan skemmst frá því að segja að fljótlega rekast félagarnir á fleiri sveitamenn sem eru enn óvinveittari og það breytir því sem átti að vera ánægjuleg helgarferð í baráttu upp á líf og dauða. Þessi mynd er eflaust frægust fyrir atriði þar sem einum félaganna (leikinn af Ned Beatty) er nauðgað af ógeðslegum sveitalubba sem lætur hann hrýna eins og svín meðan byssu er beint að honum. Grunnhugmyndin á bakvið söguna er góð og myndin byrjar mjög vel en síðasti hlutinn veldur verulegum vonbrigðum og endirinn skilur áhorfendur eftir í algerri óvissu um ýmis lykilatriði. Í hreinskilni sagt var helsta ástæðan fyrir því að ég gróf þessa mynd upp sú að skotið var að mér að þetta væri ein af þessum myndum sem allir sannir kvikmyndaáhugamenn þyrftu að hafa séð og á meðan ég get ekki verið algerlega sammála því eftir að hafa séð myndina fannst mér þetta vera áhugaverð og á köflum spennandi mynd. Ég hugsa mig allavega tvisvar um áður en ég fer næst í útilegu!