Bringing Out the Dead (1999)

Leigði þessa mynd á spólu um daginn. Ekki möguleiki að hún gæti verið leiðinleg, Martin Scorsese að leikstýra. En annað kom á daginn. Myndin var svo leiðinleg að ég virkilega íhugaði að hætta að horfa þegar 20 mínútur voru eftir, en hugsunin um að eitthvað áhugavert gæti gerst í lokin sem redda myndi myndinni hélt mér við sjónvarpið. En þetta hélt bara áfram að vera hugsun því myndin endaði eins og hún var allan tímann: drepleiðinleg. Scorsese virðist hafa reynt að skapa íburðarmikið og sláandi sjónarspil, en varúð, það eina sem hann skapaði var kaos. Því miður, en það bara virkar ekki. Myndin er einhvern vegin laus við allan söguþráð og er bara einfaldlega ruglandi og óáhugaverð. Ég hef ekkert á móti myndum sem er tiltölulega erfitt að fylgja eftir sögufléttunni, en í fullri hreinskilni, þá er ekki nógu mikið að gerast í myndinni sem kveikir forvitni manns. Mjög mikil vonbrigði. Er það virkilega satt að þessari mynd var leikstýrt af sama hæfileikaríka manni og gerði Goodfellas, Taxi Driver, Raging Bull, Cape Fear og Mean Streets??? Maður myndi að minnsta kosti ekki giska á það eftir að hafa horft á þessa mynd.......

"Bringing Out the Dead" er nýjasta kvikmyndaverk meistaraleikstjórans Martin Scorsese (Taxi Driver, GoodFellas, Casino) en hún er byggð á samnefndri bók Joe Connelly, sem var sjúkraliði í New York í 9 ár og miðlaði í bókinni reynslu sinni á mjög áhrifaríkan hátt. Hér segir af Frank Pierce sem starfar við bráðadeild sjúkrahúss í New York og sinnir útköllum á staði þar sem Dauðinn hefur í öllu sínu veldi og margbreytileika reitt ljá sinn til höggs. Frank er fyrir löngu búinn að fá meira en nóg af starfinu enda hefur hann ekki fundið leið til að aðskilja starfsreynslu sína frá einkalífinu og er stöðugt ásóttur af hugsunum um útköll þar sem honum mistókst að bjarga lífi fórnarlambanna. Segja má að hann sé nálægt því að fá taugaáfall af uppsöfnuðum kynnum sínum af dauðanum og sorginni sem fylgir. Við fáum nú að fylgjast með Frank og félögum hans í bráðadeildinni næstu 56 klukkustundirnar og örvæntingarfullri leit hans að einhvers konar réttlætingu á veru sinni í þessu skelfilega starfi sem býður upp á fátt annað en eftirsjá og sorg. Þetta er afar áhrifamikil spennumynd sem þó er krydduð meinfyndnum svörtum húmor í takt við efnið og skartar í aðalhlutverki óskarsverðlaunaleikaranum Nicolas Cage sem sýnir og sannar hér enn á ný hversu magnaður leikari hann er, en hann hlaut óskarinn sem besti leikari í aðalhlutverki 1995 fyrir stórleik sinn í kvikmyndinni "Leaving Las Vegas" (hann hefur ekki leikið betur í betri mynd en þessari síðan þá, hefur hinsvegar leikið í mörgum afar leiðinlegum myndum, t.a.m. Gone in 60 Seconds sem var afspyrnuléleg). Margir aðrir frábærir leikarar koma einnig fram í myndinni og má þar nefna eiginkonu Nicolas Cage, Patriciu Arquette (Ed Wood, True Romance) John Goodman, Ving Rhames og Tom Sizemore, auk þess sem meistari Scorsese sjálfur leikur eitt aukahlutverkið, en hann ljær rödd sína manninum sem kemur útköllum á framfæri við sjúkraliðana í gegnum talstöðina. Þeim sem líka framhaldsþættirnir Bráðavaktin (ER) hvet ég til að sjá þessa mynd (hún minnir afar mikið á þá þætti og er einskonar mánaðarskammtur af henni). Og svo hvet ég að sjálfsögðu alla unnendur kvikmynda Martin Scorsese að sjá þessa kvikmynd. Hún er hröð og skemmtileg og ég hafði mikið gaman af henni. Hvet ég alla þá sem enn hafa ekki séð hana að drífa í því. Hún er vel þess virði

Þessari nýjustu mynd Scorsese mætti helst lýsa sem tveggja tíma E.R. þætti frá helvíti. Hún gerist í New York og fjallar um sjúkraliða nokkurn að nafni Frank Pierce (Nicholas Cage) sem er orðinn verulega lífsþreyttur og sjúskaður eftir að hafa sinnt þessu erfiða starfi í mörg ár, en á þeim tíma hefur hann séð hversu miskunarlausar götur stórborgarinnar eru. Þetta er ekki hefðbundin kvikmynd í neinum skilningi og fer jafnvel út í að vera listræn á köflum. Söguþráðurinn virðist frekar tilviljanakenndur en nær um leið að endurspegla dökku hliðar raunveruleikans. Nicholas Cage er hreint frábær í aðalhlutverkinu og hefur greinilega lagt margt á sig til þess að gera sig trúverðugan í hlutverkinu, þar á meðal að halda sér vakandi í einhverja sólarhringa - það er ómögulegt að skapa þetta þreytta og sjúskaða útlit með förðun. Aðrir þekktir leikarar sem fram koma eru John Goodman, Tom Sizemore og Ving Rhames, þeir gefa Cage lítið eftir. Útlit myndarinnar er líka nær óaðfinnanlegt, myndataka og lýsing ná að gera næturheim stórborgarinnar að töfrandi og dularfullum stað. Mjög góð og vel gerð mynd, en ekki fyrir alla.