Deuce Bigalow: Male Gigolo (1999)

Deuce Bigalow: Male Gigolo er ein þessara mynda sem hefði aldrei átt að gera. Hún er sóun á góðri filmu. Hér eru samankomnir leiðinlegir leikarar sem eru að leika eftir hörmulegu handriti við ennþá verri leikstjórn. Semsagt þið sem hafið einhverja snefil af skynsemi, endilega forðist þessa tímasóun og borgiði 650 kallinn ykkar í eitthvað mun skynsamlegra en þessa hörmulegu vitleysu sem kallast á mannamáli drasl

Þokkalegasta grínmynd sem fjallar um náunga nokkurn að nafni Deuce (Rob Schneider) sem starfar við að þrífa fiskabúr ásamt öðru. Dag einn ræður tilviljun því að hann kynnist manni sem er "fylgdarmaður", í raun bara karlkyns vændiskona. Deuce heillast af lífstíl hans og fær það hlutverk að gæta íbúðar hans á meðan fylgdarmaðurinn ferðast til Evrópu. Svo óheppilega vill til að hann rústar óvart íbúðinni og verður einhvernveginn að redda sér nokkur þúsund dollurum til þess að hann geti gert við hana áður en eigandinn snýr aftur. Deuce sér ekki annnan möguleika en að gerast líka karlhóra til að verða sér út um peningana og í kjölfar þess gerist margt skrautlegt. Eins og gefur að skilja er húmorinn í myndinni ekki á háu plani, en það má skemmta sér ágætlega yfir henni ef maður er í skapi fyrir léttmeti og gerir ekki of miklar kröfur. Þetta er ekki beint kvikmynd sem maður býst við að sjá einhvern stórleik í, flestir leikarar skila sínu nokkuð vel og Rob Schneider passar mjög vel í þetta hlutverk. Söguþráðurinn er bara nokkuð heilsteyptur af grínmynd að vera og óvænt rómantík kemur upp í seinni helmingnum sem af einhverjum ástæðum nær að ganga þokkalega upp og gefur myndinni pínulítið meiri dýpt, sem henni veitir sko ekki af. Ágætis afþreying sem gleymist fljótt.