Small Time Crooks (2000)

Mjög góð Woody Allen mynd sem minnir mikið á þær gömlu. Woody bæði leikstýrir þessari og leikur aðalhlutverkið eins og svo oft áður. Ray Winkler (Woody Allen) er maður sem dreymir um að verða ríkur og ákveður þá að ræna banka. Hann hefur í huga ásamt 3 öðrum vinum sínum að kaupa búð sem er til sölu en hún er við hliðina á bankanum. Svo ætla þeir að grafa göng og koma inn í bankanum. Frenchy (Tracey Ullman), kona Ray fær svo það starf að baka smákökur en búðin á að vera smákökubúð. Ray og vinir hans höfðu aldrei reiknað með því að smákökurnar hennar Frenchy mundu seljast en þar skjátlaðist þeim illilega. Smákökurnar seljast eins og heitar lummur á meðan Ray og félagar klúðra öllu saman. Einu ári síðar eru Ray og Frency svo orðin rík af smákökunum en þá finnst Ray lífið vera orðið ömurlegt. Nú ætla ég ekki að segja meira frá söguþræði myndarinnar. Þessi mynd var alls ekki vonbrigði og ég get mælt með henni þó hún hafi ekki verið eins fyndin og ég bjóst við en hún var mjög skemmtileg. Woody og Tracey voru líka frábær í sínum hlutverkum svo ég gef Small Time Crooks 3 stjörnur.

Ég veit ekki hvort ég get kallað sjálfan mig Woody Allen-aðdáanda þar sem hann hefur ekki gert góða mynd síðan Everyone Says I Love You, sem kom út árið 1996. Svo á undan henni hafði hann ekki gert góða mynd síðan Crimes and Misdemeanors. Þetta er auðvitað smekksatriði, en mér finnst kallinn vera bara of mistækur stundum. Hins vegar þegar hann er góður, þá er hann ÆÐISLEGUR! enda eru Annie Hall, Bananas, Sleeper og meira að segja þessar áðurnefndu í miklu uppáhaldi hjá mér.Small Time Crooks byrjar frábærlega og var ég strax orðinn bjartsýnn í kringum fyrsta hálftímann. Húmorinn er góður, söguþráðurinn markviss og leikararnir skemmtilega klikkaðir. Síðan heldur myndin áfram og byrjar að dala og plottið fer út í allar áttir og smám saman byrjaði ég að detta út úr myndinni, og þar af leiðandi var allur afgangurinn frekar ómerkilegur og fljótgleymdur.Woody sjálfur á fína spretti í einu aðalhlutverkinu, og Michael Rapaport ásamt Tracey Ullman eru líka mjög fyndin á köflum. Handritið (sem er að sjálfsögðu í umsjón Allens) gerir samt persónum sínum ekkert réttlæti síðar meir og verð ég að segja að ég hef sjaldan séð eins ójafna mynd eftir Woody og þessa. Ég gef henni miðjumoðseinkunn fyrir frábæran hálftíma, en klukkutíminn sem er síðan eftir er voða mikið... ekkert!5/10

Meistari Woody Allen hefur gefið frá sér mörg meistaraverkin. Þó ég segi ekki að Small time crooks sé besta mynd hans til þessa, þá á hún margt sameiginlegt með öðrum myndum hans í seinni tíð. Skemmtilegur söguþráður skondnar senur og samfélagsleg ádeila á ýmsa hluti, samræður sem ekki er hægt að koma á blað og margt fleira sem gerir Woody Allen mynd góða. Ég ætla ekki að fara út í söguþráðinn þið sjáið hann í trailernum. Auðvitað er þetta Allen mynd, en þó var eitt sem vantaði. Samhengi atriða vantaði á köflum og önnur tæknileg mistök sá maður, ef vel var að gáð. Kvikmyndataka ekkert til að hrópa húrra fyrir og allt annað bara venjuleg Hollywood taka. Sem mér finnst persónulega flottust. Leikurinn var bara þokkalegur, ég gat ekki séð neitt athugavert við hann. Niðurstaðan er sú að þessi Woddy Allen mynd er góð mynd og á skilið sæti í fremstu röð í Woody Allen safninu.