Chicken Run (2000)

Hér er komin fyrsta mynd þeirra félaga Nick Park og Peter Lord, sem að eru höfundar þáttana Wallace & Gromit. Þessi mynd fjallar um hænur sem eru að reyna að flýja frá bóndabæ Tweedy. Þetta er ótrúlega fyndin og góð mynd.

Eins og með hina dásamlegu Toy Story 2 þá er aðeins hægt að lýsa Chicken Run með orðinu "skemmtileg", því að er nákvæmlega það sem hún er. Hvernig getur mynd um breska kjúklinga sem reyna að flýja brjálaða, peningagráðuga konu verið leiðinleg? Sérstaklega þegar hún er gerð af sama fólkinu og gerði Wallace & Gromit? Og að hugsa sér hversu ótrúlega erfitt það hlýtur að hafa verið að gera þessa mynd - ég veit ekki hvað þessi mynd var lengi í framleiðslu en The Nightmare Before Christmas, fyrsta leirmyndin í fullri lengd, var meira en tvö ár í gerð. Það þarf mikla þolinmæði í að gera svona myndir. Mel Gibson stendur sig vel sem Rocky, Julia Sawalha er góð sem Ginger en það voru Jane Horrocks og Miranda Richardson sem komu skemmtilegast á óvart - þá sérstaklega Horrocks en hún fékk mann til að hlæja í hvert einasta skipti sem persóna hennar sást á tjaldinu. Það er ekki mikið meira að segja annað en að Chicken Run er hin besta skemmtun (fyrir alla fjölskylduna, hvorki meira né minna) og ættu sem flestir að sjá hana!