NCIS (2003)

Þegar ég fór á The Sum of All Fears bjóst ég við þessu venjulega. Mikil hætta skapast, góði kallinn kemur til bjargar, vondi kallinn ferst og öllu verður síðan drekkt í þjóðrembu og væmni undir lokin. En þessi kom mér dálítið á óvart. Hún reynist vera besta myndin um Jack Ryan fyrir utan The Hunt for Red October.

EF þú hefur EKKI séð myndina EKKI lesa lengra!!!!!!

Jack Ryan er hér leikinn af Ben Affleck. Hann fer að starfa fyrir CIA undir handleiðslu Bill Cabot (Morgan Freeman). Nýr forseti er tekinn við í Rússlandi (Ciarán Hinds) og ástand heimsmála er viðkvæmt, sérstaklega út af innrás Rússa í Tsjetsjeníu í óþökk Bandaríkjanna. Á meðan á því stendur hafa óprúttnir menn í Evrópu undir forystu Dressler (Alan Bates) í hyggju að smygla kjarnorkusprengju inn í Bandaríkin, sprengja hana þar og láta líta svo út sem að Rússarnir hafi gert það. Á meðan Bandaríkjamenn og Rússar eru uppteknir við að útrýma hvor öðrum þá getur risið nýtt afl í Evrópu og tekið yfir. Það er undir Ryan og John Clark (Liev Schreiber), sem sér um skítverkin fyrir Bandaríkjastjórn, komið að sjá til þess að þessi illu áform nái ekki fram að ganga og vara forseta Bandaríkjanna (James Cromwell) við í tæka tíð.

Þessi mynd er nokkuð merkileg að mörgu leiti. Hún tekur sjálfa sig alvarlega og gerir ekki lítið úr þeim möguleika að þetta gæti gerst í alvörunni. Þjóðrembu og væmni er blessunarlega haldið í lágmarki og meira er leitast við að byggja upp spennu með því að láta Ryan vera í tímahraki með að gera mönnum viðvart og komast oft ekki áfram vegna skrifræðis. Einhvern veginn er maður nú einum of meðvitaður um að þetta muni nú allt ganga upp hjá honum á endanum til þess að það takist en samt sem áður, heiðarleg tilraun. Það er meira að segja litið á málin frá sjónarhóli Rússanna einnig svo að þeir eru ekki bara einhverjir einsleitir thugs eins og þeir eru oftast sýndir. Annar stór plús. Þriðji stóri plúsinn er að vondu kallarnir í þessari eru viðbjóðslegir. Sannkallaður sori samfélagsins sem maður vonar að muni deyja einhverjum herfilegum dauðdaga í endann. Auk þess eru þeir viðvörun um uppgang fasista í Evrópu (Berlusconi, le Pen, Haider) þótt að ekki sé minnst á uppgang þeirra líka í Bandaríkjunum.

Helsti mínusinn eru leikararnir. Ben Affleck, sem mér finnst ekki mjög góður leikari, nær aldrei að vera trúverðugur eins og Harrison Ford var eða jafnvel Alec Baldwin og er frekar lánlaus hér. Morgan Freeman fær að leika enn eina útgáfuna á sama hlutverkinu og synd að þessi gæðaleikari fái ekki úr meiru að moða. Liev Schreiber er einfaldlega vonlaus leikari. James Cromwell er í svipaðri aðstöðu og Freeman. Sá eini sem vekur einhverja athygli er Ciarán Hinds sem forseti Rússlands, skynsamur maður sem þarf að höndla hið bilaða ástand heimafyrir og síðan Alan Bates sem hið viðbjóðslega illmenni.

Endirinn er afar furðulegur svo ekki sé meira sagt en einhvern veginn svo skrítinn að hann sleppur í mínum bókum.

Þetta er hin fínasta afþreying en hefur einnig heila og er í alvörunni að reyna að seyja eitthvað vitrænt um stöðu heimsmála. Mæli með henni.

Þetta er mynd sem að fyllti allar mínar væntinga og mun meira, hún fylgir ekki alveg öllum formúlum, sem er einmitt mjög gott, og er alls ekki jafn útreiknanleg og maður býst við þó svo að endirinn sé náttúrulega frá Hollywood.

Ben Affleck og Morgan Freeman standa sig með með príði í þessari mjög svo góðu spennu mynd úr smiðju Tom Clancy sem að tekst en og aftur að byggja upp mikla spennu í myndum sínum.

Þessi mynd fjallar um það að valdamenn í nýnasistaflokki komast yfir kjarnorkusprengju og ætla með henni að stýra saman tveimur stórveldum, Bandaríkjunum og Rússlandi, í stríð gegn hvort öðru,góð hugmynd.

Það var eitt sem fór þó alveg ótrúlega mikið í taugarnar á mér, ef að þú ættir flugvél með kjarnorkusprengju á sem að mundi hrapa mundir þú þá bara láta kjarnorkusprenguna liggja þar sem að vélin fórst?

Eini stóri gallinn við myndina sem annars hin besta ræma, með flottum tæknibrellum, þá á ég við stóru sprenginguna.

Þetta er mynd sem er alveg vel þess virði að sjá.

The Sum of all Fears er bara nokkuð traust spennumynd um Jarðarbúas versta ótta. Kjarnorkustyrjöld. Ben Affleck leikur Jack Ryan mjög vel og Morgan Freeman leikur hinn allknowing mentor. Og í fyrsta skipti í Kanamynd eru það Rússarnir sem hlusta á rök. Þrjár stjörnur fyrir Clancy.

Frekar slöpp spennumynd úr smiðju Tom Clancy, meistarans á bak við einn nettasta karakter kvikmyndasögunnar, CIA-greiningarmanninn Jack Ryan. Fyrri myndir Clancy's (þ.e. The Hunt for Red October, Patriot Games og Clear and Present Danger) eru bara með þeim betri spennumyndum sem ég hef séð, og það er nokkuð erfitt að kyngja þeirri staðreynd að þessi nýjasta, The Sum of All Fears, skuli hafa mistekist með það að falla í sama gæðaflokk og hinar. Ástæðan er sú að hún þjáist hreinlega alltof mikið, og á of mörgum áberandi sviðum meira að segja. Henni gengur nú svosem ágætlega hvað spennuuppbyggingu varðar og flottar sprengingar eru að sjálfsögðu til staðar, en það er handritið sem er veikasti hlekkurinn hér. Fyrst og fremst er það bara alls ekki nógu trúverðugt (eins og t.d. þegar æðsta stjórn bandaríkjamanna íhugar það að fara út í kjarnorkustríð við Rússa eftir að hafa ásakað þá um að hafa sent frá sér kjarnorkusprengju rétt hjá Baltimore... vissulega færu Rússarnir allt öðruvísi að ef þeir hefðu náttúrulega ætlað sér að fara í stríð við bandaríkin!) og í öðru lagi þá fer það oft á tíðum út í svo mikla föðurlandsvitleysu að hálfa væri nóg. Helsti galli söguþráðarins (sem minnir á köflum mjög mikið á Thirteen Days) er líka sá að hann nær ekki að halda athygli manns allan tímann eins og góðum spennuþriller sæmir. Og til að kóróna allt hefur Ben Affleck endilega þurft að hafa verið valinn í hlutverk Ryans. Affleck er alls ekki lélegur leikari (hann var að vísu ágætur í Dogma og Good Will Hunting), en án nokkurs vafa er hann rangi maðurinn í hlutverkið. Annars skil ég heldur ekki hvers vegna Clancy ákvað að yngja Ryan sjálfan (mér skilst nú að Ford gamli hafi heimtað of mikið, en því ekki þá bara finna einhvern á svipuðum aldri í stað þess að ráða Affleck??). Ég meina, til hvers eiginlega?! The Sum of All Fears gerist EFTIR viðburði þriðju myndarinnar (nánar til tekið á árinu 2002), halló?! þetta passar bara ekki. En annars þarf varla að kvarta þegar viðkemur leikhópinn, þar sem að hér eru fjölmarga gæðaleikara að finna, þ.á.m. Morgan Freeman (alltaf jafn vannýttur núorðið, eins og m.a. með High Crimes og Along Came a Spider), James Cromwell, Ron Rifkin, Phillip Baker Hall, Alan Bates og m.a.s. Liev Schrieber (stórfínn sem John Clark (karakter sem var áður fyrr leikinn af Willem Dafoe)); Þeir sjá allir vel til þess að koma Affleck útaf kortinu. Þetta er nú samt sem áður ekkert voðalega slæm spennumynd þegar á heildina er litið. Hún á góða spretti en það er einfaldlega ekki nóg til að koma í veg fyrir gloppurnar í handritinu. Best væri bara að sleppa þessari þar til að myndbandið kemur.5/10

Ég er harður aðdáðandi Rainbow Six leikjanna og er það það eina sem ég kannast við eftir Clancy. En núna er ég að hugsa um að fá að lesa bókina sem fyrst, get varla beðið. Mér finnst mjög vel valið í leikarahópinn en Jack Ryan er of ungur. Hann er búinn að vera aðalsöguhetja í mörgum bókum og eftir því sem ég hef heyrt um hann hef ég byggt ímynd mína á því að hann er eldri, veðraður og með meiri reynslu en sýnt var í bíómyndinni. Ég skil alveg að leikarinn sem lék áður Ryan neitaði að leika hann vegna þess að persónuleikinn er breyttur. Ben Affleck skilar ekki hlutverki sínu vel og það er ekki aðeins handritinu að kenna. Að mínu mati var það Liev Schreiber sem skilaði sínu hlutverki best sem John Clark þótt að hann var ekki í stóru hlutverki. Myndin er þó meistaraverk í heild sinni og er, eins og ofan frá greinir, er vel sótt vegna þess að hún fjallar um hryðjuverk eitthvað lík því sem gerðist 11. september. Enginn ætti að missa af þessari mynd.

The Sum of All Fears hélt mér vel vakandi allan tímann. Hún væri kannski ekki mjög trúverðug ef ekki hryðjuverkin þann 11. september 2001 hefðu ekki litið dagsins ljós. Þau vöktu stóran part hins vestræna heims upp til vitundar um það að hryðjuverk eiga sér ekki bara stað og stund í Austurlöndum, Mið-Asíu, Afríku og Suður-Ameríku. Myndin heldur góðum dampi og gefur nokkra innsýn (sem ég geri ráð fyrir að sé byggð á sannleikanum) í ótta kjarnorkuvelda við hvort annað og þann möguleika að kjarnorkustríð geti brotist út vegna hræðslu þeirra sem við völd sitja við að verða of seinir til aðgerða. Nokkur atriði hefðu mátt betur fara, til dæmis er þvælingur Ryans á hafnarsvæði Baltimore seinni part myndarinnar hallærislegur og óraunverulegur. Einnig er þáttur John Clark í myndinn vægast sagt ótrúverðugur, þó svo að Liev Schriber leiki hann vel. Ef einhver lóner gæti fundið hvern sem er hvar sem er á örfáum dögum væri Sadam dauður og Bin Laden líka fyrir löngu. Í heildina er myndin skemmtileg og áhugaverð fyrir það að takast á við raunveruleika hryðjuverka. Virkilega þótti mér áhugverð lýsing myndarinnar á panic ástandi Bandaríkjamannana við völd þegar að herti. Það er ekki ólíklegt að svona sé þetta, þ.e.a.s. að menn haldi ekki almennilega haus þegar eitthvað á bjátar, ekki frekar en hjá okkur hinum. Ágætis afþreying.

Hérna er kominn nýjasta myndin um Jack Ryan og að þessu sinni er það Ben Affleck sem leikur hann en ekki Harrison Ford eins og í hinum þremur myndunum. Þetta er bara hin fínasta mynd og tekst henni að búa til fína spennu á köflum og er leikur Morgan Freeman og Ben Affleck alveg ágætur. Svo ég get alveg mælt með þessari ef þið viljið sjá fína spennumynd.

The Sum of All Fears kynnir aftur til leiks einn traustasta bíókarakter sem til er, CIA-manninn Jack Ryan. Þeir Alec Baldwin og Harrison Ford hafa báðir spreytt sig í hlutverkinu og gert vel (enda Ryan sprottinn úr huga Tom Clancy), en að þessu sinni er það hortitturinn Ben Affleck sem leikur Ryan. Í þessu leikaravali liggur stærsti galli myndarinnar. Persónulega þoli ég ekki Affleck og finnst hann sérlega lélegur leikari, en að láta mann halda að hann tali rússnesku, úkraínsku, sé sérfræðingur í rússneskri stjórnmálasögu, og góðkunningi yfirmanns CIA er hreinasti brandari. Maðurinn er 29 ára... halló!? Guði sé lof eru gæðaleikarar í öðrum hlutverkum, þar á meðal Morgan Freeman, James Cromwell, Philip Baker Hall, Liev Schreiber (sem leikur John Clark mjög vel) og Ron Rifkin. Allt eru þetta vel þekktir karakterleikarar sem taka Affleck í nefið í hverri einustu senu. Myndin sjálf er temmilega traustur þriller sem snertir óneitanlega taugar manns á þessum síðustu og verstu tímum. Allt sem fjallar um hryðjuverk í Bandaríkjunum er eðlilega ofarlega á blaði, og það útskýrir kannski vinsældir myndarinnar. Stundum leið mér þannig á myndinni að það væri ósmekklegt af Paramount að sýna hana yfir höfuð, en svo fannst mér fáránlegt að ásaka kvikmyndir um að notfæra sér ástand sem þeim kemur ekkert við. Myndin er fagmannlega gerð, spennandi, raunsæ, og heldur athygli manns auðveldlega allan tímann, og það er ekki erfitt að mæla með henni. Bara að auminginn Affleck væri ekki þarna efstur á blaði...