Basic (2003)

Ágætis spennumynd frá leikstjóranum John McTiernan sem skartar þeim John Travolta og Samuel L. Jackson í aðalhlutverkum. Hardy (Travolta) er fyrrverandi sérsveitarmaður og núverandi starfsmaður í eiturlyfjalögreglunni. Hann er fenginn af félaga sínum (Tim Daly) til að rannsaka hvarf liðþjálfans West (Samuel L. Jackson) sem er talinn af ásamt nokkrum úr sveit sem hann var að þjálfa. Tveir eru eftir og sögum þeirra af atburðum í þjálfunarleiðangri ber ekki saman. Hardy fær það verkefni að yfirheyra þá félaga í óþökk herlögreglu á svæðinu (Connie Nielsen). Ágætis handrit bjargar miklu vegna heildarútkomunnar og sama má segja um leikinn. Leikaraliðið er alveg ágætt. Þeir félagar Travolta og Jackson standa sig vel í hlutverkum sínum, en þeir fóru eins og flestir ættu að vita á kostum saman í Pulp Fiction árið 1994. McTiernan hefur oft gert betur en hann á að baki myndir á borð við Die Hard, Medicine Man, The Hunt for Red October og Rollerball. Semsagt, ágætis spennumynd, hefði þó getað verið mun betri en heildarmyndin segir til um, leikstjórinn hefur oft gert betur og leikararnir spara sig óþarflega mikið. Þó er þetta ágætis afþreying, þó ekkert meira en það.

Mikið er gott að sjá að John McTiernan skuli loksins vera farinn að hugsa rökrétt varðandi kvikmyndagerð, sérstaklega eftir að hafa sett stóran, svartan blett á ferilskrá sína með Rollerball hryllingnum. Basic er að vísu engin gæðamynd en samt ágætis upplifting fyrir manninn. Myndin græðir mest á leikhópi sínum og er allra helst borin uppi af ágætis frammistöðum. John Travolta og Samuel Jackson (aftur sameinaðir síðan Pulp Fiction...) standa sig báðir mjög vel (þótt Travolta komi oft með óþolandi tilþrif af sjálfsdýrkun meðan Jackson endurtekur bara sitt hefðbundna 'badass' hlutverk). Tim Daly, Giovanni Ribisi, Taye Diggs og Connie Nielsen bregða sér í minni hlutverk og fylla vel upp í myndina. Það sem Basic hins vegar þjáist fyrir er algjör skortur af spennu. Leikstjórinn hefur sjálfsagt reynt að byggja upp spennu en þegar mynd sem þessi hefur svona margslunginn söguþráð og atburðarásin heldur sér í gangi allan tímann án þess að stoppa er í raun ekkert pláss eftir fyrir spennu. Myndin er líka ofsalega over-plotted; söguþráðurinn breytir sífellt um stefnu og kemur (bókstaflega!!) með nýja fléttu á hverju 5 mínútna fresti, meðan sumar ganga upp, og aðrar frekar langsóttar. Endirinn kom samt sem áður heldur betur á óvart og ófyrirsjáanleikinn í handritinu einn og sér nægði að hýfa myndina upp úr meðalmennskunni. Þrátt fyrir þónokkra galla þótti mér Basic hin fínasta afþreying. Hún hélt a.m.k. athygli minni allan tímann, og fyrir það sætti ég mig við það að gefa henni 6/10 í einkunn.

Svik og prettir er það sem prýðir helst myndina Basic.

Myndin segir af manni sem fengin er til þess að ransaka eitthvað óútskíranlegt sem gerist í þjálfunarbúðum sérsveitar ameríska hersins. Því dýpra sem hann grefur því meira verður um svik og pretti, þetta er ein af þessum myndum sem nánast ekkert má segja frá því auðvelt er að eiðinleggja allt plottið.

John Travolta sýnir í þessari mynd eina af sínum allra bestu frammistöðum og það með sannkölluðum stjörnuleik, allir aðrir leikarar standa sig mjög vel en hverfa þó í skugga hans.

Basic er mjög góð mynd sem ég mæli eindregið með en ráðlegg þó öllum að filgjast mjög vel með því hún er flókin og á auðvelt með að skilja eftir stórar spurningar.

Drífið ykkur að sjá hana hún er meira en þess virði.