The Haunted Mansion (2003)

Eddie Murphy er orðinn eins og allt annar maður í dag heldur en hann var fyrir rúmum áratugi. Áður fyrr var hann þessi orðljóti, síkjaftandi grínisti sem fór á kostum í Beverly Hills Cop, 48 Hrs. svo eitthvað sé nefnt. En nú undanfarið er hann bara orðinn einhver misheppnaður grínisti sem birtist bara í slöppum fjölskylduræmum og reynir of mikið á sig fyrir hlátur (Shrek & Bowfinger eru EINU undantekningarnar). The Haunted Mansion er kannski ekki jafn slæm og Daddy Day Care eða Pluto Nash (ó guð!) en hún er þó ekki heldur neitt skref upp fyrir manninn. Myndin er byggð á sama concept-i og Pirates of the Caribbean. Semsagt; Hún er byggð á skemmtitæki í Disney World (sem varir ekki einu sinni lengur en 3-4 mín. by the way). Ókei, POTC var mjög vel heppnuð og skemmtileg mynd, eiginlega of góð miðað við grunnhugmyndina. En þó svo að þetta hafi gengið einu sinni upp þýðir ekki að það sé endalaust góð hugmynd að gera kvikmyndir úr svona. Ekki bara er húmor myndarinnar ódýr og barnalegur, heldur eru brellurnar það líka. Svo hafa aðstandendur líklega búist við því að Murphy myndi stela senunni, en svo var ekki. Persónulega þótti mér þeir Terence Stamp og Wallace Shawn mun skemmtilegri. Söguþráðurinn er líka eldgamall og klisjukenndur (óveður - fjölskylda - draugagangur - mystería á bak við allt saman... hundgömul formúla). Mér finnst að Murphy ætti að gefa skít í þessi fjölskyldumyndahandrit, því hann er kominn í ansi djúpa gryfju sem ekki verður auðvelt að komast upp úr. Ég er þó innilega feginn að hann skuli vera að endurtaka eitt besta hlutverk sitt, sem asninn með munnræpuna í Shrek 2, því þar mun maðurinn eflaust bæta eitthvað smá upp.5/10