For Your Eyes Only (1981)

Með For Your Eyes Only var stigið skref í rétta átt frá hörmunginni Moonraker, en þau hefðu alveg mátt verða fleiri. Heiti myndarinnar er fengið frá smásagnasafni, sem kom út á íslensku undir heitinu Áhætta eða dauði, og var upphaflega skrifað fyrir sjónvarpsmyndaþáttaröð, er átti að framleiða í upphafi sjöunda áratugarins, en aldrei varð neitt af. Enda þótt kvikmyndin For Your Eyes Only sé öllu gáfulegri en Moonraker, ber hún þess samt merki, að aðstandendurnir hafi ekki verið vissir um hvers konar mynd þeir hafi ætlað að gera. Í henni má finna vel gerð spennuatriði eins og í smyglbækistöðinni í Albaníu, en víða annars staðar er andlaus aulafyndni alltof fyrirferðamikil. Tónlistin skemmir líka mikið fyrir, sérstaklega í hasaratriðunum, enda þótt titillagið sé alveg þolanlegt. Bondbeibið Carole Bouquet rétt sleppur frá sínu, en sögur hafa lengi gengið um það í fjölmiðlum, að hún hafi eitt sinn verið karlmaður. Lynn-Holly Johnson er hins vegar mun færari á skautunum sínum en á leiksviðinu, enda hefur lítið frést af henni á hvíta tjaldinu eftir þetta. Á stöku stað örlar fyrir viðunandi leik hjá Roger Moore, einkum þó í Albaníuhlutanum, en að öðru leyti minnir hann einna helst á Cary Grant í Hollywoodgamanmyndum frá því á fjórða áratugnum. Sem sagt miðlungs Bond mynd sem er í mesta lagi tveggja stjarna virði. Takið þó eftir Charles Dance í litlu aukahlutverki, en hann lék síðar Ian Fleming í sjónvarpskvikmyndinni Goldeneye árið 1989.

Lifir alltaf sterkt í minningunni, enda fyrsta Bond-ræman sem undirritaður sá. Hefur það fram yfir aðrar Moore-myndir að söguþráðurinn er akki algjörlega út í hött. Fjallar um leit Bond að týndu, eða öllu heldur sökknu, dulkóðunartæki - minnir á From Russia With Love - sem tvinnast saman við hefndarleit aðalkvenhetjunnar. Höfðu foreldrar hennar verið myrtir af bófunum og leitar hún réttlætis með lásboga að vopni. Flottir sprettir og fínn hasar en heldur sig samt á jörðinni.