Edward Scissorhands (1990)

Edward Scissorhands er yndisleg mynd frá leikstjóranum Tim Burton, sem er einn besti leikstjóri sem uppi hefur verið. Ég lærði það þegar ég horfði á þessa mynd að maður má ekki búast við neinu þegar maður horfir á myndir frá Tim Burton, þær eru alltaf algjörlega öðruvísi en búist var við. Ég bjóst við að Edward Scissorhands væri hálfgerð spennumynd, en í staðinn horfði ég á myrka dramamynd sem er hálfgerð gamanmynd á köflunum. Edward Scissorhands fjallar í stuttu máli um uppfinningamann (Vincent Price) sem finnur einn daginn upp mann sem hann kallar Edward (Johnny Depp). Uppfinningamaðurinn klárar Edward ekki alveg, skilur hann eftir með skæri í stað handa. Einn daginn finnur góðhjörtuð sölukona hann (Diane Wiest) og fer með hann heim til sín í hinn týpíska bæ, Suburbia (þar sem allir eiga nákvæmlega eins hús og nákvæmlega eins garða og aðrir) til að búa með fjölskyldu sinni. Tim Burton kom með hugmyndina af Edward Scissorhands, teiknaði Edward á blað, og sýndi handritshöfundinum Caroline Thompson. Á meðan Tim vann við myndina “Beetlejuice”, skrifaði Caroline handrit myndarinnar, sem er hreint og beint frábært. Tim Burton fékk svo leikarann Johnny Depp til að leika Edward, og var það upphafið af samstarfi þeirra, en Johnny lék seinna í fullt af myndum frá Burton s.s. Ed Wood, Sleepy Hollow, Charlie and the Chocolate Factory og Corpse Bride. Johnny Depp sýnir ótrúlega frammistöðu, hann lifir sig algjörlega inní Edward, sem er búinn að lifa einn í fjöldamörg ár og er því hálfskrýtinn. Í öðrum hlutverkum eru Winona Ryder (Kim) sem stendur sig mjög vel, Diane Wiest (sölukonan Peg), Anthony Michael Hall (Jim) sem er hálfgerður vondikall myndarinnar, Alan Arkin (Bill), og Kathy Baker (Joyce), persóna hennar er algjörlega tilgangslaus fyrir myndina, meira að segja hálfleiðinleg, það hefði alveg verið hægt að sleppa henni. Ekki má gleyma Vincent Price í hlutverki uppfinningamannsins, en hann stendur sig best af öllum leikurum myndarinnar með sinni klikkuðu frammistöðu. Danny Elfman sér um tónlist myndarinnar, eins og í flestum myndum Burtons (öllum nema Ed Wood). Ég gjörsamlega elska tónlistina hans í öllum myndum sem hann hefur samið tónlist í, t.d. Batman (hans besta tónlist er í henni), Spider-Man, Big Fish (tónlist sem fær mann næstum því til að gráta) og Charlie and the Chocolate Factory. Edward Scissorhands Theme lagið er jafnframt eitt af hans bestu theme lögum. Edward Scissorhands fjallar um tilfinninguna að falla ekki inní samfélagið, vilja falla inní samfélagið, reyna að falla inní samfélagið, en geta það ekki (sagði Tim Burton sjálfur). Frábær mynd sem fer beint í þriðja sæti yfir bestu myndir Burtons (á eftir Big Fish og The Nightmare Before Christmas).

Edward Scissorhands var fyrsta myndin sem að leiddi þá Tim Burton og Johnny Depp saman, og átti það samstarf eftir að leiða þá til að gera margar snilldarmyndir í viðbót, eins og Corpse Bride, Charlie and the Chocolate Factory o.fl. eftirminnilegar myndir. En um myndina. Myndin fjallar um Edward, sem að er tilraun hjá vísindamanni einum sem að fer út um þúfur og endar hann sem (ófullkomnuð) vera með skæri á einni hendinni. Hann fer í burtu og endar hjá fjölskyldu einni sem tekur hann að sér. Segi ekki meir. Þessi mynd er brilliant og hefur flest allt sem góð bíómynd þarf að hafa: Mjög góða og skemmtilega sögu, skrautlegt en samt drungalegt útlit, góður leikur frá Johnny Depp og Winonu Ryder og leikstjórn Tims alltaf jafn traust og vanalega. Frábær mynd sem allir unnendur Tim Burton ættu að vera búnir að sjá.

Ég er að skrifa umfjöllun á þessari síðu í fyrsta sinn svo ekkert vera að hneykslast mikið yfir hversu léleg hún er.

Edward Scissorhands fjallar lauslega um dreng (Jhonny Depp) sem er með skæri í stað handa og verður ástfanginn stúlku (Wiona Ryder). Ég vill ekkert segja meir um söguþráðinn af því að því minna sem maður veit um söguþráðinn fyrir myndina (þessa mynd ekki allar) því betri er hún. Það er eitt við þessa mynd, og bara flestar myndir Tim Burton's, er að hún heldur manni allann tímann, maður er alveg fastur við myndina og maður ekkert mikið að tala við aðra á meðan myndinni stendur. Svo er leikur Jhonny Depp's alveg frábær, hann segir ekki mikið en bara svipbrigðin lýsa svo gjörsamlega líðan Edward's. Hún er líka algjör fjölskyldumynd, jafnt börn og fullorðnir hafa mikið gaman af henni og ég meina það ! Edward Scissorhands töfraði mig uppúr skónum og það er á hreinu að hún fer í DVD safnið mitt.

Ég vona að greinin sé ekki algjör hörmung, takk fyrir mig.