E.T. the Extra-Terrestrial (1982)

Klassískt meistaraverk fyrir alla krakka og fullorðna.Strákur (Thomas) finnur geimveru sem er föst á jörðinni og þeir verða strax góðir vinir. Barrymore í sýnu fyrsta hlutverki sem systir Thomas og bróðir hans (MacNaughton) hjálpa honum að fela E.T. Þetta er falleg , spennandi og skemmtileg bíóupplifun sem hægt er að horfa á aftur og aftur !

E.T. er ein af þessum myndum sem skipti heilmiklu máli fyrir mig á uppeldisárum mínum. Ég gat bara aldrei slitið mig frá henni. En annað en fullt af myndum sem ég horfði mikið í æsku þá er E.T. mynd sem er almennt talin mjög góð. Hún er náttúrulega löngu orðin sígild og er tvímælalaust ein af bestu geimverumyndum kvikmyndasögunnar, allavega að mínu mati. Ég fíla hana m.a.s. mun betur heldur en Close Encounters. Hún er hjartnæm, falleg og að öllu leyti einstök. Vinátta þeirra E.T. og Elliots alveg ógleymanleg og klárlega þungamiðja þessarar einföldu en engu að síður skemmtilegu sögu.Það var óaðfinnanlegt að fá að upplifa 20 ára afmælisútgáfuna í bíó þar sem er búið að endurbæta hljóðið, ásamt nýjum senum (í þessari nýju útgáfu er búið að lengja hana um hér um bil 5 mín.). Spielberg hefur líka bætt upp á tæknibrellurnar með nútíma tækni (þótt CGI-vinnan sé sum staðar vel augljós, og frekar óþörf að mínu mati). Tónlistin eftir John Williams á mikið hrós skilið, og eins og ávallt hjá honum, þá kemur tónlistin sér vel fyrir og skapar rétta andrúmsloftið. E.T. er kannski ekki albesta mynd Spielbergs (Schindler's List mun alltaf eiga þann heiður, með Raiders rétt hangandi á eftir henni), en hún er þó ein af hans bestu og örugglega ein eftirminnilegasta, og mun líklega verða það næstu 20 árin. Myndin hefur elst mjög vel og virðulega í gegnum tíðina, og ég mæli eindregið með að fólk sjái (aftur) þessa perlu.9/10

E.T er ein af þeim myndum sem eldist mjög vel og ég fagna því að hún er aftur komin í kvikmyndihús enda er heil kynslóð sem farið hefur á mis við þessa mynd og það er vonandi að þeir sem ekki hafa séð hana flykkjast í bíó. Ég man þegar ég sá hana fyrst í bíó þá var það þvílík upplifun, ég verð að segja það að þegar ég sá hana aftur í bíó gekk ég í barndóm á nýjan leik. Það er bara eitthvað við E.T. sem að heillar mann upp úr skónum. Geimveran sjálf er skemmtilega útfærð og það var gaman að sjá ný atriði sem ekki voru í myndinni árið 1982. Endurhljóðblöndun hefur tekist frábærlega. Þeir sem ekki hafa séð E.T. - drífið ykkur, þið sem hafið séð E.T. einhvern tíman -farið aftur og endurvekið kynni ykkar af þessari frábæru mynd. Hiklaust ein af stærstu myndum kvikmyndasögunnar.

Enn þann dag í dag er viðskilnaður vinanna ET og Elliots með hjartnæmustu augnablikum kvikmyndasögunnar, slíkur er máttur Steven Spielberg að honum tekst að skapa nútíma ævintýri um ungan jarðarbúa og strandaglóp utanúr geimnum af þvílíkum sannfæringarkrafti að það heillaði mannfólkið meira en nokkurt annað kvikmyndaverk til þessa dags. Þó myndin sé enn nokkuð ung að árum er ET fyrir margt löngu orðin sígilt kvikmyndaverk og ástæðulaust að tíunda dásemdir hennar. Enda hefur hún ekki elst um dag að mörgu leyti, skemmtanagildi hennar og hinn hlýji boðskapur sem hún flutti okkur á ekkert síður erindi til okkar nú, en er hún sló öll aðsóknarmet í kvikmyndahúsum á níunda áratugnum. Ég gef henni hiklaust fjórar gylltar stjörnur og mæli hiklaust með henni, enda er hún sannkallað snilldarverk úr smiðju meistara Spielberg.