eXistenZ (1999)

Þvílik bíóferð, þegar ég ákvað að skella mér á nýjustu mynd Cronenbergs. Honum hefur tekist að gera eina bestu mynd í langan tíma í sögu kvikmyndanna, þú átt eftir að fara sem allt önnur manneskja út úr bíóinu því Cronenberg er meistari sem sýnir þér inn í annan heim engum líkur. Leikararnir eru allir fantagóðir, plottið rosalegt. Ef fólk hefur ekki fílað Cronenberg ætti það að sitja heima en þessi og Dead Ringers eru bestu myndirnar sem maðurinn hefur gert. Get ekki beðið eftir að sjá hvað þessi snillingur gerir næst!

Ég hef aldrei verið sannur aðdáandi David Cronenberg en ég hef þó mikinn áhuga á myndum hans. Mér finnst allar myndir hans mjög góðar, frábærar jafnvel, en þær eru mismunandi aðgengilegar. Vandamálið er að þær eru oft of fráhrindandi fyrir minn smekk (t.d. Crash) eða bara of pervertískar (Crash, aftur, og Naked Lunch - "would you rub some insect powder on my lips? OJ!). eXistenZ er kannski aðgengilegasta mynd Cronenberg til þessa þar sem hún inniheldur ekki of mikið af földum vísunum í afbrigðilegt, slímugt kynlíf og er fráhrindikrafturinn ekki jafn öflugur og í sumum af hans bestu (verstu?) myndum. Hér er lögð áhersla á veruleika og sýndarveruleika (eins og í Videodrome) og mörkin þar á milli, sem eru ekki alltaf eins augljós og þau virðast. Jennifer Jason Leigh leikur Allegru Geller, þekktasta og besta tölvuleikahönnuð í heiminum. Myndin byrjar á samkomu, einskonar "sneak-preview", fyrir nýjasta leik hennar: eXistenZ (borið fram EXX-i-stENZ). Á að prófa hann í fyrsta skipti á almenningi en allt endar í ósköpum og Allegra, ásamt dyraverðinum Ted Pikul (Jude Law), endar á flótta undan einhverju fólki sem vill hana feiga. Hún hefur þó meiri áhyggjur af ástandi leiksins og upphefst nú meira en lítið skrítin atburðarrás sem gerist bæði innan í leiknum og utan hans - eða hvað? Cronenberg gerir allt óraunverulegt og súrrealískt eins og honum einum er lagið og hefur okkur ávallt á verði. Það skemmtilega við tölvuleikinn hans er að hann lítur ekki út eins og tölvuleikur heldur afbrigðilegur raunveruleiki, og eins og allir vita er allt afbrigðilegt hjá Cronenberg svo við vitum aldrei hvar við erum. Mér fannst mun skemmtilegra að horfa á eXistenZ í annað skiptið og sjá margvíslegar vísbendingar og ábendingar í hinum og þessum atriðum og gat ég notið þess að sjá "lífs-mekanisman" í allri sinni dýrð. Samanburður Cronenberg á tölvuleikjaspilun og samförum er augljós, þó ég skilji ekki endilega hvað hann er að fara, og er alltaf gaman að sjá fólk gefa frá sér frygðarhljóð þegar lífrænum "snúrum" er troðið inn í bakið á þeim... Kannski var rangt af mér að segja að þessi mynd væri aðgengileg... Ég verð einnig að minnast á frábæru leikarana: Jennifer Jason Leigh nær sinni persónu frábærlega og er alveg stórkostleg í sínu hlutverki. Aðeins litlausari, en litli verri, er Jude Law sem Pikul. Willem Dafoe og Ian Holm eru svo í mjög skemmtilegum smáhlutverkum. Ef þið eruð aðdáendur Cronenberg þá hafið þið örugglega gaman af þessari mynd, ef þið eruð það ekki þá getið þið alveg sleppt því að sjá hana. Ef þið eruð ekki viss, þá mæli ég með eXistenZ þar sem hún er stórskemmtilegur Cronenbergari í aðeins léttari stíl.

Mjög svo sérstök mynd þar sem leikstjórinn David Cronenberg leikur sér með mörk veruleikans. Söguþráðurinn gengur í stuttu máli út á það að leikjahönnuður nokkur sem Jennifer Jason Leigh leikur hefur hannað nýjan byltingarkenndan tölvuleik en þegar kemur að því að leyfa fólki að prufa leikinn tekur atburðarásin óvænta stefnu. Ég átti ekki von á hefðbundinni mynd þar sem Cronenberg sér um leikstjórn og þessi mynd er líka allt annað en hefðbundin. Maður þarf að pæla vel í myndinni til að skilja fyllilega þá flækju furðulegra atburða sem er að gerast. Áhugaverð og vönduð mynd sem ég mæli með fyrir þá sem eru opnir fyrir "öðruvísi" kvikmyndum og finnst ekki verra að þurfa að hugsa þegar þeir fara á bíó.