Blue Streak (1999)

Martin Lawrence er hér kominn í hlutverk gimsteinaþjófs sem er gómaður fyrir rán og nær hann að fela fenginn í auðri byggingu rétt áður en hann er handtekinn. Tveimur árum síðar er hann látinn laus og kemst þá að því að hann faldi gimsteininn í miðri lögreglubyggingu og þarf hann því að dulbúa sig sem löggu til að ná steininum. Martin Lawrence er hér, eins og alltaf, jafn skemmtilegur í sínu hlutverki og hefur enn ekki klikkað. Hann gerir þessa mynd bæði fyndna og skemmtilega alveg frá byrjun til enda.

Þvílík vonbrigði þessi mynd er. Samfelld leiðindi og þvæla frá upphafi til enda. Martin litli er bara ekki nógu góður leikari alveg eins og vinur hans Will Smith .Þessi mynd voru mestu vonbrigði síðasta árs. Punktur basta.....

Ég sé ekki eftir því að hafa farið á þessa mynd, hún var svo skemmtileg. Martin Lawrence var fyndinn í hlutverki sínu sem ofurlöggan en er bara óheppinn demantaþjófur sem sat inni í tvö ár fyrir þjófnað. Hann hafði þó náð að fela demantinn í loftræstikerfi auðrar byggingu sem á þessum tveimur árum breyttist í löggustöð (hversu óheppinn er hægt að vera) og á stað þar sem aðeins löggur máttu fara. Sem sagt ágæt mynd.

Góð gamanmynd þar sem segja má að hún hafi verið sérsniðin utan um Martin Lawrence. Leikstjórinn Les Mayfield hefur gott tak á myndinni allan tíman. Martin fær að njóta sýn alla myndina og hún virðist ekki missa taktinn eftir því sem líður lengur á myndina.

Ekki átti ég von á miklu þegar ég settist niður fyrir framan tjaldið áður en myndin byrjaði þar sem að auglýsingasýnishornin úr myndinni heilluðu mig ekki mikið. Samt sem áður olli hún mér stórkostlegum vonbrigðum. Helsti gallinn er handritið sem er mjög ófrumlegt og lítt spennandi, ég er sannfærður um að nánast hvaða menntaskólakrakki sem er hefði getað skrifað þetta. Martin Lawerence er í aðalhlutverki sem innbrotsþjófur sem neyðist til að skilja við demant sem hann stal rétt áður en að hann er handtekinn. Eftir tvö ár (sem virðast hafa liðið fljótt fyrir kappann) losnar hann og vill þá endurheimta demantinn. Þá uppgötvar hann að nýbyggingin sem hann faldi demantinn í er orðin lögreglustöð. Í stuttu máli þarf hann að dulbúa sig sem lögreglumann til þess að komast inn og verður fyrir einskæra tilviljun strax yfirmaður yfir einni af deildunum. Tilraunir Lawerence til að vera fyndinn misstu gjörsamlega marks hjá mér, ekkert nema hálfvitagangur og grettur. Við skulum bara orða þetta þannig að ég hló nánast ekki út alla myndina (þó að einstaka atriði hafi verið brosleg). Svo til að toppa þetta allt saman þá virðist boðskapurinn sem falinn er í myndinni vera að glæpir borgi sig. Fólk sem gerir einhverjar raunverulegar kröfur til gæða kvikmynda ættu að forðast þessa.