Mighty Joe Young (1998)

Að mínu mati er þetta bara hundleiðinleg mynd. Bekkurinn minn fékk einu sinni að velja videospólu og þessi varð fyrir valinu. Ég sofnaði yfir henni. Myndin á að fjalla um einhverja konu sem er að reyna að bjarga górillu (Joe) og auðvitað kemur eitthvað ömurlegt atriði þar sem Joe gerir eitthvað sem er ómögulegt í raunveruleikanum og það á að hrífa mann, koma manni til að grenja eða eitthvað. Þessi mynd er bara alltof væmin fyrir minn smekk og meira til. Hún er ekki stjörnu virði hjá mér!

Fín fjölskyldumynd sem segir frá risavaxinni górillu að nafni Joe. Hann hefur búið allt sitt líf í frumskógum Afríku án þess að umheimurinn viti af tilvist hans en það breytist einn daginn þegar vísindamaður nokkur (Bill Paxton) rekst á hann. Veiðiþjófar og fleiri óprúttnir náungar hugsa sér gott til glóðarinnar því að svo sjaldgæft dýr er mjög verðmætt. Það er því ráðið á að flytja Joe til Bandaríkjanna í dýragarð til þess að bjarga lífi hans. Það gengur samt ekki alveg vandalaust þar sem enn eru menn sem vilja veiða hann sér til gróða. Þetta er að mörgu leiti dæmigerð Disney mynd og því frekar ófrumleg. Söguþráðurinn er þokkalegur en flestir leikarar eru hér í meðallagi. Tæknibrellurnar eru ansi magnaðar þar sem górillan er í flestum tökum tölvugerð og lítur mjög raunverulega út, enda var myndin tilnefnd til óskarsverðlauna fyrir tæknibrellur. Það er ekki mikið meira um þessa mynd að segja - hún gengur vel upp sem fjölskyldumynd og maður getur skemmt sér þokkalega ef maður gerir ekki of miklar kröfur, þó er hún reyndar í lengra lagi miðað við innihald.